امریکہ اچھی جگہ ہے۔ مزے کی ہے مگر کچھ باتیں اس کی نرالی ہیں ایسی کہ حیرانگی ہوتی ہے۔ ویسے میرے ذہن میں اکثر یہ خیال آتا ہے کہ اگر امریکہ سے سب کو نکال دیا جائے اور سارے پاکستانی یہاں آباد ہو جائیں تو اس ایک ملک کے کتنے ملک بنا دیں گے ہم لوگ۔ اتنی ریاستوں کو متحد رکھنا بہت بڑا کام ہے۔
صدر امریکہ کا ہو یا پاکستان کا عام عوام ان کو بے وقوف اور اجڈ ہی مانتی ہے۔ یہ بے چارے جو مرضی کر لیں لوگ ان کے اور ان کی پالیسیوں کے خلاف ہی رہتے ہیں۔ ویسے شائد صدر بن کر دماغ پر اثر پڑتا ہے۔ ایک اسٹیج ڈرامے میں صدر کی کافی شامت آئی تھی۔
امریکی ریاست کولوراڈو کے homeowners association کے صدر جناب bob kearns کو نہ جانے کیا سوجھی کہ ایک خاتون کو گھر سے seasonal symbol اتارنے کا حکم دے ڈالا۔ یہ سمبل دراصل سبز رنگ کا ایک گولا ہے جس کے نچلے کنارے پر سرخ ربن لگا ہوا ہے جو کہ امن کا نشان ہے جبکہ یہ چیز آجکل میرے سارے علاقے میں تقریباُ ہر چوتھے گھر پر لگا ہوا ہے۔
خاتون کے انکار پر ایسوسی ایشن کے صدر نے architectural committee کے پانچ ارکان کو حکم دیا کہ خاتون کے گھر سے یہ نشان زبردستی اتروایا جائے۔ پانچوں ارکان نے یہ حکم ماننے سے انکار کر دیا کہ ان کے خیال میں یہ ایک seasonal symbol ہے جو کرسمس گزرنے کے بعد اتر جائے گا۔
صدر کا کہنا تھا کہ یہ اینٹی عراق وار نشان ہے اور ان کے بیان کے مطابق کچھ دوسرے لوگوں نے انکو بتایا ہے کہ یہ دراصل شیطان کا نشان ہے۔ صدر اور کچھ نہ کر سکے تو انہوں نے پانچوں ارکان کو نوکری سے برطرف کر دیا جو کہ میرے خیال میں آزادی اظہار کا گلا گھونٹنے کے مترادف ہے۔ دوسری طرف انہوں نے خاتون کو روزانہ 25 ڈالر جرمانہ ادا کرنے کا حکم جاری کیا ہے۔
خاتون کے بیان کے مطابق ان کے وہم و گمان میں بھی عراق وار نہیں تھی جب وہ اس کو اپنے گھر کے باہر آویزاں کر رہی تھیں۔ لیکن اب وہ اس قسم کی بدمعاشی برداشت نہیں کر سکتیں لہذا وہ اس کو کرسمس سے پہلے نہیں اتاریں گیں۔
اس طرح کی مطلق العنانی ہمارے ملک میں ہی نہیں امریکہ جیسے ملک تک میں ہوتی ہے لہذا کڑھنے کی ضرورت نہیں صدر بن کر انسان کو کچھ ہو جاتا ہے اور وہ میں تب تک بتا نہیں سکتا جب تک میں خود صدر نہ بن جاؤں۔
